Aapne ek baar mujhse kaha tha,"kisi bhi rishte ko bahut seriously mat lena'..jab aapne kaha tha tab theek se nahi samajh payi thi par aaj shayad behtar samajhti hoon. Rishte kuchh ajeeb hote hain na, seriously le lo to kabhi kabhi kaid kar lete hain aur na lo to hum doshi ho jaate hain.
Ab ghar se door aksar aapke saath bitaaye waqt ko yaad karti thi. Aapke anek kisse kahaniyan, woh vanasthali ki mauj masti, bikaner ke that baat, maa se nonk jhonk..aapne apne jeevan ke kai rang mujhe dikhaye. Un rangon se maine aapko kuchh aur jaana. Meri mala japti, shlok budbudati amma mein hamesha ek chulbuli shaitaan ladki thi, jisne zindagi se lad jhagad kar, apni sharte manwa hi leen theen. Ghar ki badi hone ke naate sabhi zimmedaariyan bakhoobhi nibhayin. Aatmanirbharta ki jis raah ko bachpan mein pakda tha us par apne kadam kabhi na dagmagane diye.
Pichhle dinon jab aap hospital mein rahin to main roz sochti thi ki jaane aapke man mein kya chal raha hoga. Andaaza hi laga rahi thi ki aap bhagwan se bas yahi maang rahin hongi ki mujhe paradheen mat karna. Aap baaki assi saal ki boodhi auraton se kahin alag theen. Umra ab jhurriyon mein jhalakti thi, haddiyan dukhti bhi theen, par un aankhon ki chamak aur buland aawaz mein woh shaitaan ladki ab bhi rahti thi. Mujhe pata hai aapne jee jaan se apne shareer ko khada karne ki koshish ki hogi. Par ye bhi jaanti thi ki aapko zindagi apne sharton par chahiye thi, kisi aur par nirbhar hona aapko katai manzoor nahi hoga. Aur shaayad yahi hua, aapne jab dekha ki ab shareer saath nahi de raha to aapne use chhod dena theek samjha.
Aap aksar hamaare laakh rokne ke baawajood bas ye kah kar hardwar laut jaati thin ki, " beta, zyada din man nahi lagta, mujhe apni gangaji ke paas rehna hai." Amma ye kahaan chali gayin is baar? Sach kahoon to maine aapko baadlon mein khade dekha hai, aap hamesha ki tarah khikhila kar hans rahi ho aur mujhe kah rahi ho, "prachi main to bhaag aayi wahaan se, ab yahin rahoongi".
Amma, pata hai, hamaare is ghar mein din bhar khoob achhi dhoop aati hai. Maine aksar socha hai ki aap yahaan aaogi to aapko maza aayega. Amma... aana zaroor.
1 comment:
amma dhyaan mein hain. abhi mummy awaaz lagaayegi thodi der mein.
dekhna phir kahengi, "beta ichha nahi hai." phir mummy bina kuchh kahe thaali saamne rakh dengi toh chhote bachchon ki tarah, be-man se dining table par beith kar khana khaayengi.
amma dhyaan mein hain.
Post a Comment